Sad il nikad!

Fiba.com

Preneseno sa: kosmagazin.com

Piše: Darko Đeletović

Od 13 preostalih američkih igrača u Kolanđelovoj i Popovićevoj ekipi, koji u Australiji nastavljaju pripreme za Kinu, većina njih su, statistički gledano, prosječni ili ispodprosječni NBA igrači. Među takozvanim naprednim statistikama na internet stranici basketball-reference.com postoji “VORP” indeks, gdje se individualni indeksi mjere po kombinaciji komplikovanih uzusa statističkog doprinosa nekog od NBA igrača na 100 prosječnih pozicija u timskoj igri. Ovaj indeks pratim već godinama i pokazuje se, barem po NBA standardima, kao ispravnije mjerilo uspjeha igrača i njihovog uticaja na uspjeh tima od nekih drugih popularnijih indeksa. Od preostalih Amera u top 50 po “VORP”-u najbolje kotiraju Kemba Voker na 17. mjestu (Janis je ukupno drugi iza Hardena, Jokić je recimo treći, a Vučević deveti), Bruk Lopez na 37, Majls Tarner na 39. i ni kriv ni dužan povratnik u reprezentaciju Mejson Plamli – na 44. mjestu. Gober je, poređenja radi, četvrti, Galinari 43, Sabonis 45, Ingles 47, Bjelica 55, a Bogdan 88. igrač lige.

Iako ovaj statistički indeks ne potvrđuje ništa, i najobičnijem košarkaškom laiku je jasno da je ovaj američki tim njihova najslabija reprezentacija još od onog Tomljanovićevog navrat-nanos sklepanog tima pred SP usred štrajkačkog ljeta ’98, a možda čak i od one zadnje NCAA reprezentacije s Alonzom Morningom i Kenijem Andersonom koju su naši lako dobili i na Igrama dobre volje u Sijetlu, a i u Argentini na SP ’90.

Gledajući utakmice Srbije na Akropolis kupu a i strimove utakmica Crne Gore koja je manje-više tijesno izgubila sve tri pripremne utakmice u Francuskoj protiv jakih reprezentacija, ne mogu da ne budem optimističan što se tiče naših pred Svjetski kup u Kini. Pogotovo nakon dominacije Srbije u skoku u sve tri utakmice u Atini, onakvog rasturanja Italije od strane Jokića i kompanije, pa potom i pobjedom bez Jokića protiv Grka i njihove sudijke, a pogotovo svođenjem Grik Frika na podnošljivu razinu njegove ofanzivne uspješnosti.
Crnoj Gori bi prolaz u drugu fazu i igranje protiv Amerikanaca i Turaka bio veliki uspjeh, mada će u grupi biti teško portiv Grka i iskusnih Brazilaca, a ulazak u 1/4 finale bi bio prava senzacija. Sa devetim najboljim igračem NBA lige po “VORP”-u, uz iskusne Dubljevića i Bjelicu, ni Crnogorci se nikog ne bi trebali bojati, barem ne na niskom postu.

Još uvijek je prerano predviđati rezultate utakmica po preliminarnim grupama ne znajući ko će još do kraja mjeseca pokidati ACL ili otkazati bez objašnjenja kao DiEron Foks, ali obzirom na Akropolis kupu osiromašeni roster Italijana bez Galinarija i Datomea, i totalnu nemoć ostalih, čini mi se da i s njima dvojicom u sastavu u Kini sigurna pobjeda Srbije protiv žabara u grupi D ne bi trebalo da bi dođe u pitanje. U Vuhanu će najvjerovatnije iskrsnuti baksuzni Portorikanci, tradicionalna nagazna run & gun mina na mnogim takmičenjima u prošlosti, a onda bi pobjeda Srbije protiv Španaca 8. septembra mogla da garantuje izbjegavanje Amerikanaca do finala.
Na pripremnoj utakmici u Anahajmu preostali Ameri su izgledali prilično ubjedljivo protiv džet-legovanih Španaca u samom početku utakmice, pogađali začuđujuće dobar postotak šuteva iz daljine i odvojili se, ali ni Španci nisu razočarali. Da nije bilo domaćinskog suđenja pobjeda američke reprezentacije je čak mogla doći i u pitanje pred sami kraj. Ameri su i sa ovim C timom još uvijek favoriti na kladionicama, ali primjetno sve manji sa više otkaza i što se približava prvenstvo. Ako im Australija pred velikim brojem navijača na stadionu u Melburnu, ili Kanada u Sidneju, budu parirali u narednim egzibicionim utakmicama u mjeri u kojoj su to uradili Španci u Anahajmu, a Srbija opet odere Talijane i dobije i Francuze u zagrijavanju pred samo prvenstvo, kvote bi se mogle i izjednačiti. Trenutno su nikad povoljnije za Srbiju na američkim kladionicama, pogotovo u Vestgejtu u Vegasu.

FIBA WORLD CUP ODDS 2019

Spain +1400 +1700 +2000
France +3000 +2900 +4000
Lithuania +3500 +5500 +10000
Australia +4000 +4000 +5000
Canada +4000 +6000 +10000
Turkey +6000 +12000 +25000
Argentina +7000 +8500 +15000
Germany +10000 +11000 +25000
Italy +10000 +11000 +25000
Russia +25000 +9500 +25000
Brazil +25000 +11000 +30000

Ni Španci, a nadam se ni Ameri u polufinalu ili finalu se neće naigrati pod samim košem protiv Jokića i Milutinova, ali ni protiv Bjelice na četvorci. Na vanjskim pozicijama se protivnici Srbije imaju čemu nadati, tako da će polivalentan odbrambeni igrač kao Milosavljević koji uvijek grize u odbrani baš faliti Đorđeviću.

Mada, kad pogledam postavu Amera primjeti se da osim jedina dva prošlogodišnja All Star igrača Vokera i Midltona, i možda Herisa koji bi mogao ostati 13. prase, i nema šutera specijalaca u rosteru koji bi razbili zonu. Tejtuma i Seltikse pomno pratim i njemu se na proljeće ’18 iz neznanih razloga naglo pogoršao šut sa distance u odnosu na početak ruki sezone i ostao je na tom nižem nivou cijelu prošlu sezonu. Čini mi se da bi se nekom Saletovom “box & 1” džank odbrambenom varijacijom sa Jovićem i Micićem s niskim stavom i podignutom rukom i 10-12 cm prednosti nad Vokerom, ili sa Simonovićem i Lučićem (ako bude potpuno zdrav) kao tjeračima Midltona ili Tejtuma, mogla totalno neutralizirati napadačka oštrica Amera. Moj Luivilski Kardinal Donovan Mičel, a ni Džejlen Braun ili Markus Smart, ako jedan od ove dvojice Seltiksa ne otpadne, nisu posebno dobri šuteri. Herison Barns, mada sa dobrim procentima za 3, nije “clutch” igrač, a Džo Heris kao najbolji NBA trojkaš po procentu prošle sezone i u slučaju da uđe u 12 vjerovatno neće imati preveliku minutažu, a i nije neko za koga će se graditi akcije i blokovi.

Popovićevi visoki igrači Tarner i Lopez se ne libe da šutaju trice, ovaj potonji zadnje tri sezone u Milvokiju i kad treba i kad ne treba, pa bi u nekom pick and popu Amera naša postava sa još jednim sporim centrom uz Jokića mogla biti pogubna za nas, ako ih krene šut. Stoga me je strah one Saletove postave sa Bjelicom na trojci i za modernu košarku presporih Raduljice i Marjanovića na petici uz Jokića koji nije puno brži.

Ali i Đorđević ima opcije u odbrani sa Bjelicom, Simonovićem i Lučićem na poziciji 4, bez obzira na otsustvo Kalinića i povredu Milosavljevića. Bjelica se pokazao kao antidot za Janisa u Atini, pa nema razloga da ne zaustavi neke prosječne NBA igrače.
Ali o tom – potom, nadam se polovinom septembra.

Be the first to comment

Leave a Reply

Your email address will not be published.


*